依篇短文刊出之日，應該係final year同學出緊 long con，思索緊前路之時，舊時嘅前輩，多數都會話，畢業做幾年公立醫院學吓野先，日後再諗發展，不過早了解早預備，一定有好處，所以今次講吓香港地做護士可以選擇嘅出路。
1. 政府及公營機構
公立醫院當然唔在講啦，政府部門如衞生署、社會福利署嘅護士職位都係近年熱門嘅選擇。疫症之下，衞生署嘅工作頓成咗鎂光燈焦點，其實衞生署一直都係負責香港公共衞生以及基層醫療嘅部門，讀書時期可能較少接觸，不過講到母嬰健康院、胸肺診所、衞生防護中心等等，相信大家都唔陌生，政府護士職位唔係全年招聘，有興趣嘅記得留意政府嘅招聘廣告。除左傳統護士職位外，都有唔少同學會投考紀律部隊職位，例如懲教署、消防處。
2. 非政府機構
香港大部分社福服務都係由非政府機構(NGO)營運，例如安老院、殘疾人士院舍、日間中心以至近年政府推行嘅地區康健中心，對社區工作有興趣嘅同學可以嘗試了解，睇睇會唔會成為日後嘅選擇。
3. 私人機構
私家醫院、醫療中心、保險公司、醫學美容、醫療設備／軟體公司等等等等，以至透過中介公司搵工，不同工種可謂百花齊放，長工短炒日間長夜，基本上咩都有得揀，尤其近年醫療保險愈來愈普及，私人市場有好大嘅發展空間。當然，私人公司同公營機構最大嘅分別，可能就係對盈利嘅睇法唔同。
4. 學術研究及教學
護士進修已經係大勢所趨，PRCC、Master可能已經係CV嘅基本配置，隨著愈來愈多醫療相關課程開辦，亦都有唔少護士選擇進入教學工作，如果有心志投身研究同教學，就要諗下盡快拎多張「沙紙」啦。
5. 轉行
讀本科，又無話一定要做本科嘅，可能有同學讀到最後，發覺自己原來唔想做護士，唔好覺得浪費，成世人流流長，梗有機會遇上轉換跑道嘅時間，最緊要清楚自己想要嘅係乜，唔好俾自己後悔。
我同班嘅同學，有畢業後一直做公立醫院，有一早投身私營市場，有進修到博士學歷晉身教授之列，有轉讀其他科目轉行，有全職媽媽，一路行一路諗，總會搵到一條屬於自己嘅路。
最後，大家記得留意 Nursing Council 今年推出嘅 Voluntary Scheme on Advanced and Specialised Nursing Practice，尤其如果大家諗住報名讀 Master，就要了解日後如果想透過依個計劃申請專科護士資格有咩要留意啦。
文: c.w.
